Kompania e taksive elektrike, me “prizë” në kullën qeveritare/ Prej afro 3 vitesh, taksistët e Tiranës flasin për “bosin” që po i konkuron heshturazi, me favore e mbrojtje nga Bashkia Tiranë, tatimet, policia e së fundi edhe nga Inspektorati shëndetësor
FAKT I PARË/
Ditën e premte, qarkulluam me “Taksi” ngjyrë të verdhë; që është indentifikuese e këtij shërbimi, për mjetet e licencuara të Tiranës; miratuar me Vendim nr. 2, datë 30.03.2009 të Këshillit Bashkiak (Neni 40 i rregullores).
Vetëm 2 kilometër nga nisja, na ndaloi policia rrugore për verifikime; më tej Policia Bashkiake për licencën e taksat; më tej Hetimi Tatimor, bashkë me inspektorët e shfrytëzimit rrugor. Pranë destinacionit, na ndaloi inspektorati shëndetësor, për maska, doreza e termometër “Covid”.
Pyetëm taksistin: – Ç’ne, gjithë këto kontrolle?
Përgjigja: – Ka afro 2 vite, ky avaz. Na është qepur shteti, me qëllim që të vonohen, mërziten e të mos na vijnë klientë; për të favorizuar agjencinë e taksive të bardha me vija jeshile.
Ca thonë, sikur e ka biznes Erjon Veliaj; ca thonë e ka Endri Fuga, por gjersa shteti bezdisë taksitë e verdha dhe nuk i ndalon fare jeshilet; tregon se një nga këta të dy e ka patjetër.
Provoni bëni një udhëtim me taksitë jeshile dhe do shikoni; se nuk i ndalon askush, as kur shkelin vijat e bardha dhe kalojnë me semafor të kuq.
FAKTI I DYTË/ Ditën e shtunë, për të verifikuar atë çfarë tha “taksisti i verdhë”, bëmë 3 lëvizje me “taksi jeshile”, në 3 zona të Tiranës.
Gjatë gjithë udhëtimit, në asnjë pikë kontrolli, nuk na ndaloi asnjë lloj shërbimi policor, tatimor e shëndetësor; madje kthenin shpinën ose përshëndesnin me gishtin e madh “Ok”.
I thamë taksistit: – Mirë që udhëtuam me këto jeshilet tuaja, se me ato taksitë e verdha vonohemi; ngaqë në çdo kilometër i ndalon policia, tatimet e bashkia…
Përgjigja e “taksistit”: – O shoku, nuk ka b**th kush, të na ndalojë neve! E di gjithë dynjaja, që janë të atyre tek Rama. Ndaj “Lali Eri” i ka bërë të bardha me vija jeshile, që të dallohen.
Prova është një dokument zyrtar
Çfarë të vërtete, ka në këtë “histori” bashkie e qeverie, që po krijon monopol klientelist dhe në shërbimin “TAXI”?
Këto janë episode e biseda konkrete, të bëra në raporte të natyrshme “Taksist-Klient”; dhe janë indicie, për verifikim zbatim ligji, nga agjensia e taksive jeshile me logon kompania “Green Taxi”, që financiarisht menaxhohet nga M. Muzhaqi.
Por është e vërtetë, se Erjon Veliaj, ka bërë “vendim të posaçëm” e të kundërligjshëm, në Këshillin Bashkiak, madje duke ndryshuar Vendimin nr. 2, datë 30.03.2009 “Për shërbimin taxi”.
Me Vendim Nr. 126, datë 23.11. 2017 të Këshillit Bashkiak-Tiranë, ka miratuar propozimin e veçantë të kryebashkiakut Erjon Veliaj; që përcakton gjithë automjetet “TAXI” në Tiranë, të jenë të verdha, ndërsa vetëm të kompanisë “Green Taxi”, duhet të jenë të bardha me vija jeshile.
Nëse nuk është zbuluar, se ky biznes është i Erjon Veliajt, apo i Endri Fugës; nuk ka asnjë dyshim, që vendimi për të miratuar ngjyrën e veçantë, vetëm për mjetet kompanisë “Green Taxi”, është “shenjë kujtese” për policinë, tatimet etj., që këto janë biznes i shefave të pushtetit.
Kaq për sot! Në vijim, të dhëna doganore, policore e tatimore, për këtë kompani mjetesh “Taxi” elektrike; që sipas provave që disponojmë, rezulton se janë me “prizë karikimi” në kullën qeveritare./Pamfleti
Comments
Post a Comment