Rama publikon videon, rrëfehet Luljeta Bozo: Ngrihem që në 4, bëj çdo ditë 5 km në këmbë, njerëzit më falënderojnë që…

 Agora News

Kryeministri Edi Rama e ka nisur mëngjesin e sotëm me prezantimin e Luljeta Bozos.

Bozo e cila kryeson listën e kandidatëve për deputetë në listat e Partisë Socialiste flet për jetën e saj e për qëllimet që ka në fushën e politikës, shihet edhe teksa shkruan në tastierë.

Inxhinierja shprehet ndër të tjera se punon prej 56 vitesh pa ndërprerje dhe se deri më soy ka 35 libra të botuar. Kandidatja për deputete është ndalur edhe tek rutina e saj e përditshme. Ajo tregon se zgjohet që në orën 4:30-5:00 dhe menjëherë bën një ecje prej 5 kilometrash. Bozo shton gjithashtu se ka dëshirë që të përmirësojë gjendjen e pensionistëve dhe për t’i aktivizuar në disa probleme shoqërore ku ata do ta ndiejnë veten shumë mirë dhe shumë të dobishëm për shoqërinë.

Fushën e dytë që ka si prioritet është fusha e kërkimit shkencor, bashkëngjitur me fushën e arsimit të lartë.

Rrëfimi i Bozos:

Gjënë më të shtrenjtë kam kohën, se po të iku koha nuk rikuperohet. Në 1965 mbarova studimet në fakultetin e Inxhinierisë, u diplomova inxhiniere ndërtimi, meqënëse isha me rezultate shumë të mira më mbajtën direkt në universitet, kam 56 vjet që punoj pa ndërprerje. Librin e parë e kam nxjerrë në vitin 1975. Në vazhdimësi deri sot kam bërë gati 35 libra të botuar. Çohem shumë herët 4:30-5:00 dhe menjëherë bëj një ecje 5 kilometra, ky është regjimi ditor i ushtarit. Për moshën që kam them që kam akoma për të përmirësuar pak gjendjen e pensionistëve dhe për t’i aktivizuar në disa probleme shoqërore ku ata do ta ndiejnë veten shumë mirë dhe shumë të dobishëm për shoqërinë. Fushën e dytë që kam si prioritet është fusha e kërkimit shkencor, kjo do të jetë e bashkëngjitur me fushën e arsimit të lartë se s’mund të zhvillohet arsimi i lartë pa kërkimin shkencor. Një javë rresht pas tërmetit unë kam qenë në të gjithë televizionet pa asnjë interes se fundja unë nisem nga parimi i famshëm që thotë bëje të mirën hidhe në det nuk të humbet. Njerëzit fitonin një qetësi se më vinin mesazhe pa fund nga Shqipëria, nga Amerika, nga Kanadaja, nga Franca se e ndjekin. Kjo është një gjë shumë e mirë që shqiptarët kudo që janë në botë janë të lidhur me vendin e tyre. Takoj njerëz pa fund, nuk i njoh fare më japin urimet, më japin falënderimet që pranova të kandidoj dhe urimet për t’i përfaqësuar. Në këto urime e falënderime në një vit e gjysmë, shumë shumë herë shprehnin dhe dëshirën që ne duam kështu njerëz që t’i kemi të na përfaqësojnë.

Bozo kandidon në Tiranë në listat e PS-së për zgjedhjet e 25 prillit. Vetë kryeministri Edi Rama tha se e kishin shumë të vështirë që të vendosnin mes saj dhe Najada Çomos për vendin e parë të listës në Tiranë, por në fund vendosi Bozo.